Barnas Turlag arrangerer turar og aktivitetar for barn og barnefamiliar, både i nærmiljøet og på fjellet. I Indre Sunnfjord Turlag har vi Barnas Turlag i Førde, Askvoll og Fjaler, som gjennom året inviterer til varierte aktivitetar og naturopplevingar for heile familien. Nokre tilbyr også Turbotrim, som gir barn og familiar ekstra inspirasjon til å utforske nye turmål på eiga hand.
Aktivitetane er svært varierte. Det kan vere fotturar, skiturar, klatring, padling, hovudlyktturar, breturar, påskeeggjakt eller kveldsmat rundt bålet.
Eit av dei største arrangementa våre er Kom deg ut-dagen, DNT sin nasjonale turdag, som blir arrangert første søndag i februar og første søndag i september kvart år.
Barn frå 0 til 12 år kan vere med i Barnas Turlag. Aktivitetane våre er gratis og opne for alle. Du treng ikkje vere medlem for å delta, men vi set stor pris på alle som vel å støtte arbeidet vårt gjennom medlemskap. Barnemedlemskap kostar 155 kroner per år. Foreldre og føresette har ansvar for eigne born på turar og aktivitetar i regi av Barnas Turlag.
Barnas Turlag blir driven av engasjerte frivillige som ønskjer å gi barn og familiar gode opplevingar ute. Du treng ikkje vere turleiar eller friluftsekspert for å bidra. Mange oppgåver kan delast på fleire, og du får støtte frå både andre frivillige og DNT undervegs.
Som frivillig kan du vere med å planleggje og gjennomføre turar, aktivitetar, turbopostar og familiearrangement. Du kan bidra av og til når det passar, eller bli ein del av ei fast frivillig gruppe.
Har du lyst til å vere med i eit av Barnas Turlaga våre i Førde, Askvoll eller Fjaler? Ta gjerne kontakt på indresunnfjord@dnt.no. Vi sørgjer for at førespurnaden kjem vidare til rett gruppe, og terskelen for å ta kontakt skal vere låg.
Barnas Turlag Askvoll
Barnas Turlag Fjaler
Barnas Turlag Førde
