Med Oddvar Drevsjø sin bortgang har Voss Utferdslag mista ein bauta som brukte store deler av sitt vaksne liv i friluftslivet og laget si teneste.
Publisert: 29. august 2025
Nyheter
Foto:
Oddvar var tillitsvald i Utferdslaget i 24 år og det var stor breidde i engasjementet hans. Han var elleve år i hyttestyret på Torvedalshytta, fire år i stølsturgruppa og ein svært viktig ressurs for seniorgruppa. Oddvar var lommekjend i Vossafjella og var svært kunnskapsrik på namn og plassar i heradet vårt. Denne kunnskapen fekk seniorgruppa stor glede av, for kvart år tok Oddvar ansvar for å setja opp kveldsturprogrammet for seniorane. Her stod alltid nye og spanande turar på programmet, og mange av turane leia han sjølv.
I heile 24 år var Oddvar engasjert i vardekomiteen vår, og i 16 år var han leiar av gruppa. Han målte raude T-ar, laga varder, rydda stiar, skilta ruter, vølte bruer, organiserte dugnadar og snakka med grunneigarar. Me kan alle senda ein stor takk til Oddvar kvar gong me går forbi den raude, trygge og synlege T-en i Vossafjella.
Oddvar var ein god, kunnskapsrik og raus mann, eit ja-menneske og ein trufast slitar. Oppdrag og oppgåver vart alltid gjennomført med Oddvar på laget. Han hadde unik kunnskap om naturen, talte naturen si sak og var ein stolt naturvernar.
For sin mangeårige innsats vart Oddvar tildelt Voss Utferdslag sin gullknapp i 2022. Voss Utferdslag takkar Oddvar for det heilhjarta arbeidet han la ned i laget, til stor glede for oss alle.
