Seniortur til Bergen i strålande sol

Vi var i alt 9 deltakarar medrekna 2 turleiarar. 8 av oss reiste med tog frå Gol. Den niande, ei dame frå Nederland, møtte oss i Bergen. I tillegg slutta ei dame frå Bergen seg til oss på nokre turar og måltid. Ho har tidlegare vore med oss på fleire 3-dagarsturar. Ho hadde ikkje høve til å vera med oss på heile opplegget vårt denne gongen.

1. dagen: Etter å ha installert oss på hotellet gjekk vi ein tur på byen. Hotellet låg ved fisketorget, altså svært sentralt. Om kvelden åt vi middag på ein triveleg restaurant ikkje langt frå hotellet.

2. dagen tok vi Fløibanen opp til Fløien. Etter ein halv time der vi nytte utsikten over dei sentrale delane av Bergen, gjekk vi opp på fjellet Blåmanen (554 m.o.h.), først på ein av dei mange grusvegane der oppe gjennom skog med kjempestore grantre, så på asfaltert bilveg langs den bratte fjellsida før vi gjekk på sti bort til toppen. Vi hadde ein lang og god matpause der og nytte den storslåtte utsikta mot mange av byfjella og heilt ut i havet.  På tilbaketuren tok nokre av oss banen ned att. Resten av gruppa sprang ned den bratte og svingete fjellvegen og kom tidsnok til at heile gruppa kunne eta middag samla nede ved torget.

Om kvelden var vi inviterte heim til ho som hadde vore med oss på fleire 3-dagarsturar tidlegare. Tusen takk til henne for triveleg lag og flott bevertning!

3. dagen tok vi toget til Arna og buss eit lite stykke og gjekk opp på fjellet Ådnanipa (456 m.o.h.), eit svært populært turmål i bydelen Arna. Her er det vid utsikt nordover Sørfjorden mot fabrikkstaden Ytre Arna, mot Lindås, ja kanskje heilt til Masfjorden og Sogn når sikten er god. I aust hadde vi den store øya Osterøy like over fjorden, og Gullfjellet (987 m.o.h.), høgaste fjellet i Bergen kommune. I vest såg vi rett ned på Indre Arna med Arna stasjon og fjellryggen som skil Arna frå Bergen sentrum, Åsane og havet lengst ute i horisonten.

Etter ein lang matpause og mykje informasjon, følgde vi stigen ned til gardane på Åsheim og følgde den asfalterte vegen ned til Øyrane torg ved Arna stasjon.  På Peppes pizza var det god plass til oss, og vi hadde ein lang og god middag der. Etterpå tok vi toget tilbake til Bergen sentrum. Om kvelden gjekk nokre av oss ein tur på byen.

4. og siste dagen sjekka vi ut av hotellet og tok bussen mot Bønes. Der frå gjekk vi den no så kjende Løvstien, ein vel 6 km lang turveg som endar på Melkeplassen i Laksevåg bydel der vi tok bussen tilbake til sentrum. Om lag halvveges går turvegen over ei vel 300 meter lang bru som er bolta fast i den bratte fjellsida under fjellet Løvstakken. Dette er høgdepunktet på denne turen. Elles er det fin oversikt over Bergendalen, Bergen sett frå vest og utover byfjorden. Turvegen er lagt til rette for rullestolbrukarar, syklistar, barnevogner og alle gåande. Absolutt ein tur å anbefala når ein er i Bergen og har tid til ein tur.

Før vi gjekk til jernbanestasjonen med all bagasjen, fekk vi tid til å eta lunsj på ein triveleg kafe.

Togturen tilbake til Gol gjekk etter ruta utan forseinkingar. 4-dagarsturen vart svært vellykka. Det var sol stort sett heile tida, noko vind nede i sentrum, men neste stille på fjelltoppane. Turen blei gjennomført utan uhell av noko slag. Tusen takk til turdeltakarane for trivelege dagar!

Turleiare Ester Christensen og Bjørn Vegard Johnsen