Turlaga i DNT Sogn og Fjordane ønskjer frivillige velkommen!
Bli frivillig i turlaget – del turglede og naturopplevingar med andre!
Er du glad i friluftsliv, og ønskjer å gjere ein forskjell i naturen og lokalsamfunnet? Bli med som frivillig i ditt lokale turlag! Som frivillig får du høve til å dele di eiga turglede, utforske nye stiar, og bli del av eit engasjert og sosialt fellesskap med andre friluftsentusiastar.
Publisert: 05. mai 2023
Om DNT
Korleis melder du deg som frivillig?
Uansett erfaring er du velkomen – vi har oppgåver som passar for alle! For å registrere deg, kan du gå direkte til vårt frivilligsystem på https://dnt.mobilise.no/mobile. For at du skal sleppe å hugse fleire brukarnamn og passord, vil det vere same innloggingsinformasjon i frivilligsystemet som på Min Side på dnt.no.
Kva kan du bidra med?
Lokale turlag i tidlegare Sogn og Fjordane står for aktiviteten i sitt område, som hyttedrift, stimerking, og aktivitetar. Vi har mange ulike oppgåver, slik at du kan velje etter kva du interesserer deg for og kva tid du har til disposisjon. Nokre eksempel:
Turleiar – lei turar i fjell og fjordlandskap for store og små, og del dine turopplevingar med andre. Vi har fellesturar, Barnas Turlag, DNT ung, Fjellsport, gålag og seniorgrupper.
Arrangement og aktivitetar – hjelp til å organisere event som "Kom deg ut"-dagen, familieturar eller kart- og kompasskurs.
Dugnadar– ver med å merke stiar, vedlikehalde hytter, byggje klopper eller halde naturen rein.
Tillitsverv og organisasjonsarbeid - administrative oppgåver knytt til drift, UT.no, kommuniksjonsarbeid eller høyringsuttalar.
Kva får du som frivillig?
Som frivillig får du både fagleg og sosialt utbytte, kan delta på kurs og aktivitetar, og møte likesinna. I tillegg får du tilgang til medlemsfordelar og eksklusive arrangement som takk for innsatsen.
Velkomen til turlaget – saman skaper vi minnerike turar og tek vare på naturen vår!
Dersom du vil vite meir eller ha hjelp til å finne rett lokallag, ta kontakt på sft@dnt.no.
(Du treng ikkje vere medlem i DNT for å vere frivillig i eit lokalt turlag, men vi set pris på alle nye medlemmer!)
