Dette er 7- fjellsturen

Dette er ruta

Deltakarane på 7-fjellsturen følgjer ei dagsmerkt løype over toppane rundt Ørsta sentrum. Turen er om lag 23 kilometer lang, med nærare 1700 høgdemeter totalt.

Turen startar på Vallasetra og går langs heile Mosegga. Den fyrste toppen er Rambjørhornet (812 moh.), der ein får flott utsikt mot mellom anna Saudehornet, Kjærringa og Vassdalstinden. Derfrå går turen vidare langs eggen til Sandhornet, som med sine 909 moh. er både det høgaste punktet på Mosegga og det høgaste punktet på 7-fjellsturen.

Vidare følgjer vi eggen til Grøthornet (748 moh.), før nedstigninga byrjar mot Kråkenakken (465 moh.).

Frå Kråkenakken følgjer vi stien ned gjennom tettare vegetasjon og vidare til Brekkesætra. Herifrå går turen vidare langs hellevegen og stien ned til Brungotvegen, før vi kryssar fylkesvegen og tek hengebrua over Ørstaelva. Når vi kjem til Melsvegen, følgjer vi denne til vi kjem inn på skogsveg og merkt sti sørover mot Melsætra.

Frå Melsætra stig stien jamt oppover mot Melshornet (807 moh.). Vidare går ruta ned langs eggen mot Dinglavatnet, før ein kort stigning tek oss opp til Vardehornet (580 moh.). Frå Vardehornet går turen vidare over eit litt myrlendt område før siste stigning opp til Niven (560 moh.).

Frå Niven følgjer vi stien ned til stikrysset ved Osdalsætra/Ossætra. Der tek vi mot nordvest og følgjer stien vidare til Gammalsætra (parkering ved bommen). Frå Gammalsætra går ruta vidare ned til Oklahøgda, før stien tek oss vidare ned til Hansholen og vidare til Ørsta Camping.

Til slutt følgjer vi gangvegen forbi Rema 1000 og Meieriet, over brua og bort til Småbåthamna.

Kortare tur?

Vi arrangerer òg 4-fjellstur over Sandhornet og 3-fjellstur over Melshornet. Meld deg på 7-fjellsturen og kryss av for den distansen du ønsker å gå.