Om 7-fjellsturen er i meste laget, kan både 3- og 4-fjellsturen vere gode alternativ!
Publisert: 30. oktober 2024
Inspirasjon
4-fjellsturen Rambjørhornet, Sandhornet, Grøthornet og Kråkenakken (Mosegga)
Turen startar på Mossætra og går vidare langs heile Mosegga. Først bestig ein Rambjørhornet, som ligg 812 moh. Herfrå er det flott utsikt mot mellom anna Saudehornet, Kjerringa og Vassdalstinden. Deretter held turen fram langs egga til Sandhornet, som med sine 909 moh er det høgaste punktet på Mosegga og det høgaste på denne 7-fjellsturen. Vidare følgjer ein egga til Grøthornet (748 moh). Herifrå byrjar nedstigninga mot Kråkenakken (465 moh), før turen går vidare ned til Mosmarka og vidare til Ørstahallen.
Turen er om lag 11 km lang med rundt 670 høgdemeter. Gradering: Middels Tidsbruk: 3–8 timar
3-fjellsturen Okla, Melshornet og Vardehornet
Turen startar ved Ørstahallen i Ørsta sentrum, og følgjer gangstien til Ose camping. Derifrå går ein opp Hansholen og vidare langs stien til Gammalsætra. Vidare er det ein tydeleg sti opp til Okla (Pølsa), 620 moh. Turen held så fram over egga og opp til Melshornet, 809 moh.
Deretter følgjer ein stien ned mot demninga ved Dinglavatnet, før stien går vidare opp til Vardehornet, 580 moh. Frå Vardehornet går turen ned mot Osbakken og vidare til stikrysset ved Ossætra. Så følgjer ein same vegen tilbake via Gammalsætra til Ørstahallen.
Turen er om lag 13 km lang med rundt 860 høgdemeter. Gradering: Middels Tidsbruk: 3–6 timar
Påmelding
Bruk same påmelding som til 7-fjellsturen, og velg den distansen du vil gå.
