Velkomen til heile Norges turdag 6. september!

Kom deg ut-dagen er heile Norges turdag, og kvar haust og vinter kjem barnefamiliar saman til små og store arrangement over heile landet. Turdagen er heilt gratis, og du treng verken dyrt utstyr eller erfaring for å vera med. 

6. september vil me ha DEG med på tur! 

– Kom deg ut-dagen er ein festdag me alltid gler oss til. Det er så kjekt å treffa barnefamiliar og sjå folk kose seg ute. Målet er å visa at du ikkje treng dyrt utstyr eller reisa langt for å komma deg ut på tur, seier Birgithe Roald, leiar for aktivitet i Bergen og Hordaland turlag. 

Her finn du alle våre lokale arrangement: 

• Bergen: Kom deg ut-dagen ved Skomakerdiket på Fløyen
• Bergen: Kom deg ut-dagen med Mesternes mester i Alvøskogen
• Askøy: Natt i naturen og Kom deg ut-dagen på Herdla fort
• Tysnes: Kom deg ut-dagen i Kjevikjo
• Bømlo: Kom deg ut-dagen i Melkevik på Hiskjo
• Kvinnherad: Kom deg ut-dagen på Holmen i Dimmelsvik
• Øygarden: Kom deg ut-dagen i Blomvåg
• Vaksdal: Kom deg ut-dagen i Agnavika (Obs! Laurdag 5. september)
• Samnanger: Kom deg ut-dagen med fellestur til dagsturhytta Prestakvile
• Fusa: Kom deg ut-dagen med tur fra Va til Ådlandssætra

Låg terskel for å bli med

På Tysnes står det ein gjeng med frivillige klare til å ta deg imot i vakre Kjevikjo. Den fine, vesle bukta ligg godt skjerma for vêr og vind, og er ein perfekt møtestad på Kom deg ut-dagen.  

– Her pleier det å komma barnefamiliar, gjerne 40-50-60 stykk. Det er frå dei aller minste til 10-11 år, seier Rebekka Høgestøl frå Tysnes Turlag. 

I Kjevikjo er det kort veg til arrangementet, her kan du også trilla med barnevogn. Dette går igjen på alle Kom deg ut-dagane rundt omkring i distriktet: Her snakkar me låg terskel for å vera med. 

Det varierer frå stad til stad kva slags aktivitetar som er, men her er nokre døme på kjekke ting å vera med på: 

• Natursti
• Bål og grilling
• Kano og andre aktivitetar i vatn
• Ansiktsmaling
• Snekring av fuglekasse
• Kanskje kommer DNT-maskoten Turbo på besøk? 

Ta med barnebarna?

No gler Høgestøl og frivillig-gjengen i Tysnes seg til dagen. 

– Det er kjekt å bidra til at folk kjem seg ut, og at me kan finna på ting i lag. No håpar me berre på fint vêr, seier Høgestøl. 

Pssst! Kom deg ut-dagen er perfekt for deg som er tante, onkel, besteforelder eller berre ein god ven av ein barnefamilie. Kanskje dette er helga du skal tilby deg å vera barnevakt, og gjera noko gøy med ungane? Garantert eit populært forslag hjå store og små.