Sol og varme var ramma om rundturen over Skaget denne søndagen, for ei sprek gruppe på ti personar. Dette var dagen før "verste" tropevarmen sette inn, og shorts og t-skjorte var antrekket. Berre på sjølve toppen, som er med i årets Kremtopp-jakt, var det behov for ei tynn jakke utanpå.
Published: July 20, 2026 Written by:
Tor Harald Skogheim
Trip report
Frå toppen av Skaget er det vidt utsyn, her vestover mot Vangsfjell og Jotunheimen.Photo: Tor Harald Skogheim
Gåturen starta frå parkerings-/info.plassen ein knapp kilometer før stølane på Storeskag. Etter ein time på god og tørr sti vart det matpause i stidelet like ved den karakteristiske fjellformasjonen Nasen.
Litt småklyving gjer ruta frå vest noko meir spanande enn den frå aust. Foto: Tor Harald Skogheim
Vidare valde vi å gå opp ruta frå vest, som er meir spanande og variert enn den mest brukte frå aust. Ekstra fint var det undervegs å få tidleg og flott utsyn mot Jotunheimen. Også langs denne ruta er det små vardar, men etter kvart oppover er det nokre få punkt der hendene må takast litt i bruk. Turen opp gjekk likevel heilt greitt for alle. Ved toppvarden på 1685 meter er utsynet vidt, mot vidder, vatn og fjell i alle retningar. Vi såg også mot Rondane, sjølv om det var litt disig. Det seiest at i klårvêr kan ein sjå heilt til Gaustatoppen.
Drikkepause tidleg på turen, med Skaget ruvande bak (Nasen t.h.). Foto: Tor Harald Skogheim.
Ned att følgde vi "hovudruta", som etter kvart nedover har ein del parti med nokså laus småstein. Godt var det difor å kome ned på platået fram mot Nasen, der underlaget var lyng, gras og stein. Rett ut for varden vart det triveleg matpause på ei lyngkledd hylle tett på stupkanten, i ly for litt trekk frå nord. Resten av turen gjekk lett på god sti, og vi var nede ved bilane att knappe fem timar etter at vi starta.
