Slik var Monsen minutt for minutt i Jotunheimen

Ein av dei mange blide og sterke DNT-frivillige på Monsen minutt for minutt-etappen i Jotunheimen. Her på veg frå Skogadalsbøen til Vetti.
Ein av dei mange blide og sterke DNT-frivillige på Monsen minutt for minutt-etappen i Jotunheimen. Her på veg frå Skogadalsbøen til Vetti. Foto: Marius Dalseg Sætre

Me er no halvvegs inne i vandringa saman med Lars Monsen. Jotunheimen viste seg frå si beste side i veka som var. Sjå bildekavalkaden!

Veke to av Monsen minutt for minutt er historie. Fantastiske TV-bilete og opplevingar er skapt. Det takka vere uthaldande frivillige med sterke ryggar og pågangsmot til tusen, i tillegg til eit mildt sagt imponerande lag frå NRK. 

Fyrste dag på turen gjennom Jotunheimen byrja med regn, skodde og tordenfare frå Bøvertun til Sognefjellshytta, men turfølget på rundt 160 personar kom seg trygt inn på hytta. Der vart klede tørka, bein kvilt og sommaråpningssending gjennomført. 

– Flotteste nedturen eg har hatt nokon gong

Etter eit spektakulært døgn frå torsdag til fredag på Fannaråken med noko så sjeldan som sol frå morgon til kveld, gjekk etappe to frå 2068 moh og ned 1200 høgdemeter til Skogadalsbøen. Dette er ei nedstiging med mykje stein, men også gjennom eit fantastisk frodig landskap og med utsyn til toppar kor enn ein snur seg. Lars Monsen lot seg imponera vel nede på Bøen; 

– Eg gjev meg ende over kor bra vèr me har hatt på denne turen. Dette er den flottaste nedturen eg har hatt nokon gong. 

På Skogadalsbøen sto vertskap og tilsette klare med servering av alt det turfolket kunne ønska seg. Like ovanfor tunet var det moglegheiter for eit forfriskande bad i kulpen, og til middag fekk gjestane høyra historia om korleis "Gjendines bådnlåt" blei til då Edvard Grieg gjesta Skogadalsbøen. Vertskapet på Bøen vart foreldre for fyrste gong til Ask Elias i vår, les meir om korleis livet som hyttevert i "foreldreperm" utartar seg her!

Varm mottaking i Øvre Årdal

Frå Skogadalsbøen gjekk turen nedover Utladalen til Fleskedalen, der teltleir vart etablert. Etter vandringa frå Fleskedalen via idylliske Vettismorki og siste bratte nedstigning til Vetti gard, vart Monsen med følge møtt med jublande årdøler som hadde møtt fram for å ta dei i mot. 

– Samanlikna med Hardangervidda er det ikkje tvil om at det har vore ein tøffare tur fysisk, men samtidig har det vore heilt vanvittige stunder. Det å ligga på Fannaråken, få opp teltduken om morgonen og så sjå Hurungane, det er så mektig. Og å ha dette vèret som me har hatt denne og sist veke, me kunne ikke bestilt det betre sjølv. Dette kjem til å sitja lenge i ryggmargen, avsluttar Monsen til NRK.

Og med Jotunheimen vel gjennomført gjenstår Vesterålen og Indre Troms. I Indre Troms treng me framleis frivillige. Ei fantastisk og sosial oppleving for den som kan ta i eit tak og bera tungt. Er det deg eller nokon du kjenner? Registrer deg hos DNT!

Annonse